Afganistán: arroz con cordeiro, pasas e cenouras

Qabili Pilau é como se chama esta receita e é, probábelmente, o prato nacional afgano. Rico, sinxelo e vistoso, non desmerecería nunha comida de celebración ainda que precisaría, como no noso cocido, dunha pota de tamaño considerábel para cociñar esas grandes cantidades que visten tanto a mesa como a louza fina.

Esta é a derradeira receita que publico sobre Afganistán, país do que ficei namorado grazas ao libro Noshe Djan. Estes receitairos descoñecidos son as descobertas que máis desfruto e os prefiro aos libros de edicións máis coidadas pensados para o mercado. Por desgraza, demasiados libros de cociña son vítimas da volubilidade das modas e avellentan mal. Este libro, non.

Ingredientes:

* 3 ou 4 cebolas
* 2 pernas de cordeiro
* 4 cenouras
* Pasas
* Comiño en po
* Aceite de millo ou xirasol
* Sal
* Arroz basmati

O día anterior a preparar este prato, deixamos a remollo en auga ben salgada o arroz.

Cortamos as cebolas en anacos pequenos e douramos moi ben en aceite de sabor neutro.

Retiramos a cebola e douramos moi ben as pernas de cordeiro

Unha vez douradas, xuntamos as cebolas, botamos auga e cocemos durante unha hora.

Cando a carne estea case lista, escorremos o arroz, poñemos a ferver auga abuntante noutra pota e cocemos brevemente durante dous minutos. Escorremos de novo e pasamos por auga fría.

Cortamos as cenouras en bastóns finos e refogamos nunha tixola. Reservamos e facemos o mesmo coas pasas até que hinchen. Reservamos.

Pasamos o caldo e as cebolas pola turmix e reservamos.

No paso final, botamos o arroz na pota, engadimos unha culleradiña de comiño e un vaso do caldo, mesturando suavemente. Unha vez feito debería ficar unha montaña de arroz na pota.

Colocamos as pasas e cenouras nun lado e a carne noutro. Botamos por enriba do arroz o aceite que sobrara de refogar cenouras e pasas.

Tapamos cun pano limpo e colocamos enriba a tapa da pota. Pechamos ben para que quede o máis hermética posíbel. Cocemos a lume minimísimo durante 45 minutos.

Tras este tempo o arroz debería quedar solto, moi aromático e cunha costra fina.

Para a súa presentación, nunha prata grande colocamos o arroz, tentando que a costra fique na parte de arriba. Poñemos a carne a un lado e cenouras e pasas ao outro e á mesa.

Leave a Reply